Starfinu ekki óviðkomandi

Útsending upplýsinga í vikulegum pistli um störf Dags B. Eggertssonar borgarstjóra til starfsmanna borgarinnar samrýmist hlutverki hans sem framkvæmdastjóra sveitarfélagsins.

Þetta kemur fram í svari skrifstofustjóra borgarstjóra, við fyrirspurn fulltrúa Sjálfstæðisflokks um vikulegan tölvupóst borgarstjóra til starfsmanna. Netfangalistinn hafi ekki verið notaður til miðlunar á efni sem sé starfi borgarstjóra óviðkomandi.

Borgarfulltrúar Sjálfstæðisflokks sögðu Dag halda úti pólitískri fréttaveitu með vikulegum pistlum á póstlista. Umhugsunarvert sé að skrifstofa borgarstjóra telji það samræmast reglum að borgarstjóri noti þennan vettvang sem æðsti embættismaður borgarkerfisins til að hnýta í pólitíska fulltrúa minnihlutans.