Leitin að Herði enn engan árangur borið

Ekkert hefur spurst til Harðar Björnssonar sem leitað hefur verið að á og í kringum höfuðborgarsvæðið undanfarnar rúmar tvær vikur. Enn berast vísbendingar en engar sem hafa leitt til nokkurs árangurs við leitina að sögn Ágústs Svanssonar, aðalvarðstjóra hjá lögreglunni á höfuðborgarsvæðinu.

Ágúst segir engin sérstök plön varðandi leitina um helgina. Lögreglan haldi áfram að elta þær vísbendingar sem berist. Afar umfangsmikil leit var um síðustu helgi þar sem á annað hundrað björgunarsveitarmenn komu við sögu.

Leitað var í hellum og útivistarsvæðum en þegar hefur þéttbýlið í Reykjavík verið þakið vel. Þá hefur einnig verið leitað eftir strandlengjunni í kringum Sundahöfn en það hefur engu skilað til þessa. Þá hafa drónar verið notaðir við leitina.

Leitin að Herði mun halda áfram þar til hún ber árangur segir Ágúst í samtali við Vísi.