ASÍ segir verð á bílavarahlutum ekki lækka í samræmi við væntingar

Verðlagseftirlit ASÍ segir að verð á bílavarahlutum hafi ekki lækkað í samræmi við væntingar þegar horft er til afnáms vörugjalda og lækkunar virðisaukaskatts úr 25,5 prósent í 24 prósent.

ASÍ segir að varahlutir, svo sem bremsuklossar, stuðarar og stýrisendar sem áður báru 15 prósent vörugjöld hafi átt að lækka um 15,2 prósent þegar horft er til afnáms vörugjalda og lækkunar virðisaukaskatts.

Niðurstöður verðlagseftirlits ASÍ

Í tilkynningu frá ASÍ segir að verðlagseftirlitið hafi kannað verð á varahlutum í byrjun október 2014 og svo aftur í apríl 2015.

„Í meðfylgjandi töflu eru dregnar saman helstu niðurstöður úr samanburði á verðkönnununum í október og apríl. Taflan sýnir fjölda þeirra varahluta sem eru í samanburðinum frá hverju fyrirtæki og hvernig verð hafa breyst á tímabilinu.“

„Í ljós kemur að í 14% tilfella hækkar verð eða er óbreytt, í fjórðungi tilfella lækkar verð um 0-4,9%, í 17% tilfella um 5-9,9% og í 19% tilfella um 15% eða meira. Með öðrum orðum er verð í 81% tilfellum að lækka minna en sem nemur áhrifum af afnámi vörugjalda og lækkunar á vsk.

Þegar einstök fyrirtæki eru skoðuð nánar sést að hlutfallslega lækka Toyota, Hekla og Bílanaust verð oftast á bilinu 0-4,9%, Askja og Bernard oftast á bilinu 5-9,9%, Brimborg á bilinu 10-14,9% en algengasta hlutfallslega lækkunin hjá B/L og AB varahlutum er 15% eða meira. Það er því mjög misjafnt hvernig verð er að lækka á umræddu tímabili milli verslana.

Þessar niðurstöður vekja upp þá spurningu; hvers vegna er verð á bílavarahlutum er ekki að lækka meira en raun ber vitni?

Bílabúð Benna og Stilling neituðu þátttöku á þeim tímapunkti sem upphafsmæling verðlagseftirlits fór fram,“ segir í frétt ASÍ.