Helmingur íss selst á sumrin

Nánast tvöfalt fleiri sólarstundir voru á tímabilinu 1. júní til og með 19. júlí í ár miðað við á sama tíma í fyrra. Samkvæmt upplýsingum frá Trausta Jónssyni veðurfræðingi voru þær 305 í ár en 163 á sama tímabili í fyrra. Ísframleiðendur segja að þessi niðurstaða hafi mikil áhrif á framleiðslu þeirra.

„Það er töluvert mikið meiri sala núna. Það helgast af því að við erum með góða veðrið sunnan heiða,“ segir Guðrún Hafsteinsdóttir, sölu- og markaðsstjóri Kjöríss. Hún segir að í fyrra og hittiðfyrra hafi verið gott veður fyrir norðan og austan og salan þar eftir því. „En þar bara vantaði fólkið. Þegar við fáum ekki þessa góðu daga á höfuðborgarsvæðinu þá finnum við gríðarlega fyrir því,“ segir Guðrún. Það ári því miklu betur hjá íssölum núna. „Þó að það sé kalt. Það er sólríkt og það er þurrt og það er það sem skiptir mestu máli,“ segir Guðrún og bætir því við að salan sé um það bil 15-20 prósentum meiri í ár en í fyrra. Guðrún segir að Kjörís taki um helminginn af ársveltunni inn á sumarmánuðunum þremur. „Við bara lifum á sumrinu og þegar höktir í því og höktir á veðrinu þá kemur það niður á okkur og við náum því ekkert upp með öðru móti,“ segir Guðrún.

Ragnar Birgisson hjá Emmess ís segir, eins og Guðrún, að þetta sumar sé miklu betra en í fyrra. „Síðustu fimm vikur hafa verið mjög góðar. En það er líka vegna þess að við höfum verið með nýjar vörur,“ segir Ragnar og bætir því við að markaðssetning þeirra hafi skipt máli. Hann segir áhrif veðurs á íssölu vera mjög mikil. „Hiti hefur rosalega mikið að segja. Ef þú færð gott hitastig þá virkar það betur en ef það kemur sól en bullandi rok,“ segir Ragnar, en bætir því við að góða veðrið hafi komið seint. „Eins og bændurnir segja, þá erum við þremur vikum á eftir áætlun.