Þúsund manns þurfa að samþykkja leiðréttinguna fyrir miðnætti

Tæplega þúsund manns eiga eftir að samþykkja skuldalækkun ríkisstjórnarinnar á húsnæðislánum  sínum og hafa frest til miðnættis til þess að samþykkja lækkunina.

Hópurinn sem um ræðir eru þeir aðilar sem fengu niðurstöðu útreikninga ríkisskattstjóra birtan fyrir 23. desember síðastliðinn.

Skúli Eggert Þórðarson ríkisskattstjóri segir að nú þegar hafi langflestir þeirra samþykkt leiðréttinguna, eða ríflega 91 þúsund manns.

Skúli bætir við að embættið viti til þess að hluti þessa þúsund manna hóps muni ekki samþykkja leiðréttinguna. Í þeim hópi séu einstaklingar sem dvelja erlendis og geta því ekki nýtt sér persónuafslátt hér á landi. Aðrir aðila séu komnir í þær aðstæður að þeir muni ekki hafa tekjur í framtíðinni og svo séu eignameiri einstaklingar sem ákveðið hafi að samþykkja ekki leiðréttinguna.

Á milli 7 og 9 þúsund manns hafi fengið útreikninga sína birta eftir 23. desember. Þeir hafi líkt og aðrir þrjá mánuði til að samþykkja leiðréttinguna frá þeim degi sem útreikningarnir voru birtir þeim. Stærstur hluti þessa hóps sé þegar búinn að samþykkja leiðréttinguna. Á milli 2 og 3 þúsund manns sem fengu útreikningana birta eftir 23. desember eiga eftir að samþykkja leiðréttinguna.

Eftir að birta útreikninga 3 þúsund manns

Skúli segir jafnframt að eftir sé að birta útreikninga um 3 þúsund manns. Hann á von á því að það klárist á næstu vikum. Skúli segir að mikill tími hafi farið í að aðstoða fólk við að samþykkja leiðréttingarnar. Nú losni mannafli til að klára þá útreikninga sem eftir standa. „Við þurfum að fara handvirkt yfir þær umsóknir sem eftir eru,“ segir Skúili

Ýmsar ástæður séu fyrir því að útreikningum þeirra sé ekki lokið að sögn Skúla. Ákveðinn hópur hafi ekki svarað fyrirspurnum og aðrir aðilar hafi gefið upp ófullnægjandi upplýsingar við umsókn sína. Svo fylgi ákveðið flækjustig útreikningum við dánarbú en þeim útreikningum eigi einnig að ljúka á næstunni.

Þá eru einnig um 400 aðilar sem ekki hafi sætt sig við útreikninga ríkisskattstjóra og hafa skotið niðurstöðum útreikninganna til úrskurðarnefndar um leiðréttinguna.