Vodafone kvartar til Neytendastofu vegna auglýsinga frá Símanum

Vodafone á Íslandi hefur sent erindi til Neytendastofu þar sem kvartað er undan útvarpsauglýsingum Símans hf. Í tilkynningu frá Vodafone segir að í auglýsingunum sé fullyrt að Vodafone hafi slökkt á hliðrænum útsendingum RÚV og að 70% landsmanna telji Sjónvarp Símans standa framar helsta keppinautnum.

„Báðar þessar fullyrðingar eru rangar, villandi og til þess eins fallnar að kasta rýrð á Vodafone og blekkja neytendur. Símanum er fullkunnugt um að lokun á hliðrænum útsendingum RÚV er alfarið ákvörðun RÚV, enda tók Síminn þátt í forvali fyrir lokað útboð RÚV um verkið. Verkefnið sem boðið var út fólst í því að koma á stafrænum útsendingum í stað hliðrænna á landinu öllu. Síminn stóðst forvalskröfur en heltist úr lestinni á viðræðustigi. Vodafone átti hins vegar hagstæðasta tilboð og var því gengið til samninga við félagið. Með hliðsjón af þessari forsögu er fullyrðing Símans um að Vodafone hafi slökkt á hliðrænum útsendingum RÚV sett fram af ásetningi og gegn betri vitund og framsetning hennar til þess fallin að skapa neikvæð hughrif um þjónustu Vodafone.“

Það er mat Vodafone að fullyrðing Símans um að 70% landsmanna segi Sjónvarp Símans standi framar en sjónvarp Vodafone sé röng.

„Löng venja er fyrir því að sá sem heldur fullyrðingu sem þessari fram beri sönnunarbyrði fyrir henni. Verður fyrirfram að telja yfirgnæfandi löglíkur fyrir að Símanum takist ekki að sanna fullyrðinguna, enda afar ólíklegt að spurningin hafi verið borin undir 70% landsmanna. Fullyrðingin er því röng og ber að banna hana.“

Vodafone telur því að báðar fullyrðingarnar séu rangar og villandi.

„Eru þær til þess fallnar að vera ósanngjarnar gagnvart keppinauti, hafa áhrif á viðskipti og kasta rýrð á vörumerki hans. Því hefur Síminn gerst brotlegur við 2. mgr. 6. gr., b. lið 1. mgr. 9. gr., 14. gr. og a. og e. lið 2. mgr. 15. gr., sbr. 5. gr., laga nr. 57/2005, um eftirlit með viðskiptaháttum og markaðssetningu.“