Þegar æði grípur landann

Dunkin‘ Donuts er langt því frá fyrsta alþjóðlega vörumerkið sem Íslendingar taka fegins hendi. Fjölmörg dæmi eru um að langar biðraðir hafi myndast þegar erlendar verslanir og veitingastaðir eru opnaðir hér á landi. Dæmi er um að sjálfur forsætisráðherra hafi farið fyrir fjölmennum hópi fólks sem hefur fagnað komu erlends risa hingað til lands.

Hér má sjá nokkur dæmi um erlendar keðjur sem slegið hafa í gegn en listinn er langt í frá tæmandi.

Versluðu fyrir milljarð í Bauhaus

Umferðaröngþveiti myndaðist fyrir utan Bauhaus áður en verslunin var opnuð klukkan átta laugardaginn 5. maí árið 2012. Öll sex hundruð bílastæði verslunarinnar voru upptekin löngu fyrir opnun og búið var að leggja á nær hvern auðan blett við verslunina.

Halldór Óskar Sigurðsson, framkvæmdastjóri verslunarinnar, áætlaði að milli fimm og sex þúsund manns hefðu verið fyrir utan verslunina þegar hún var opnuð til að taka þátt í happdrætti og kaupa gasgrill og fleira á opnunartilboði. Fyrstu vikuna versluðu Íslendingar í Bauhaus fyrir tæpan milljarð króna. 

Þurftu að loka því allt kláraðist

Loka þurfti verslun Lindex í Smáralind eftir opnunarhelgina árið 2011 þar sem nær allar vörur verslunarinnar höfðu selst upp.

Johan Eyram Isacson, talsmaður Lindex í Svíþjóð, sagðist aldrei hafa upplifað annað eins kaupæði við opnun Lindex-verslunar.

Vörurnar hefðu átt að endast í margar vikur.

Fögnuðu komu Toys R Us

Löng biðröð var fyrir utan Turninn þegar bandaríska leikfangaverslunin Toys R Us var opnuð í október 2007.

Hleypa þurfti inn í hollum til að forðast örtröð inni í versluninni.

Opnunarhelgina voru seld leikföng fyrir 70 milljónir króna. 

Í dag rekur fyrirtækið þrjár verslanir hér á landi. Auk þeirrar fyrrnefndu er Toys R Us á Korputorgi og sömuleiðis á Glerártorgi á Akureyri.

Furðuðu sig á stóru McDonalds-skilti

Davíð Oddsson, þáverandi forsætisráðherra, borðaði fyrsta BigMac-hamborgarann á McDonalds í september 1993. Múgur og margmenni safnaðist saman við opnunina. 

McDonalds lækkaði þó verð fljótlega eftir opnun þar sem viðskiptin voru ekki nægjanleg. Ekki voru allir sáttir við starfsemi McDonalds. Bökurum þótti einkennilegt að flutt væri inn hamborgarabrauð frá Bretlandi.

Þá var rætt í byggingarnefnd hvort taka ætti niður ríflega 10 metra hátt McDonalds-skilti við staðinn því það stæðist ekki byggingareglugerð.

Fyrsti staðurinn var opnaður í Skeifunni en síðar voru opnaðir staðir bæði í Lækjargötu og í Kringlunni. Reksturinn gekk þó ekki sem skildi og var síðasta staðnum lokað í lok október 20009.

Þeir fyrstu fengu kampavín og blóm

Mikla athygli vakti þegar Kentucky Fried Chicken var opnað við Reykjavíkurveg í Hafnarfirði í október árið 1980. Þá var í fyrsta sinn hægt að fá kjúkling á Íslandi á "Kentucky-vísu“.

Hér tekur Helgi Vilhjálmsson við viðurkenningu frá fulltrúa KFC. Fyrstu viðskiptavinir staðarins voru leystir út með kampavíni og blómvendi.