Var fyrirliði skólaliðs í Columbia-háskóla

Eva Sóley Guðbjörnsdóttir hóf störf sem fjármálastjóri Advania í byrjun mánaðar. Hún hefur mikla reynslu úr atvinnulífinu. Var forstöðumaður á fjármálasviði hjá Össuri, en starfaði áður lengst af hjá Kaupþingi, síðast sem fjármálastjóri frá 2009-2011. Einnig hefur hún verið varaformaður bankaráðs Landsbankans frá árinu 2013. Þá á hún fjárfestingafélagið Íscap með vini sínum, Steinari Þór Guðgeirssyni.

Eva Sóley segist hafa ákveðið að stökkva á tækifærið hjá Advania, þótt starfið hjá Össuri hafi verið mjög áhugavert. „Þetta er spennandi fyrirtæki þar sem er mikið fram undan. Það er stefnt á markað á næstu árum og mikið að gerast hjá félaginu. Þannig að mér fannst þetta vera áhugaverð áskorun,“ segir Eva við Markaðinn.

Ólíkt mörgum fjármálastjórum, er Eva ekki viðskiptafræðingur að mennt. „Ég tók bæði BS og MS í fjármálaverkfræði í Columbia University í New York og var með hagfræði sem aukagrein. Ég flutti svo strax heim eftir nám og fór að vinna hjá Kaupþingi þar sem ég hafði verið í sumarstarfi á meðan ég var í náminu úti,“ segir Eva Sóley, en hún bjó í New York á árunum 2001-2006.

Eva spilaði mikið fótbolta á sínum yngri árum og það gaf henni færi á skólastyrk þegar hún fór til New York. Hún lætur mjög vel af dvölinni þar: „Það er náttúrlega bara eins og atvinnumennska fyrir kvenmann að komast út á skólastyrk og fá tækifæri til að læra í svona virtum skóla. Þannig að með náminu spilaði ég með fótboltaliðinu og var fyrirliði þess lengst af.“

Áður en Eva fór til New York spilaði hún fótbolta hér heima með Breiðabliki. Hún segist enn spila fótbolta af og til. „Annars hef ég meira verið í að ganga, hlaupa og í jóga síðastliðin ár. Ég á það til að meiðast þegar ég spila fótbolta, eins og vill oft verða,“ segir hún.

Þá gekk hún yfir Fimmvörðuháls um helgina í góðra vina hópi. „Það var svolítið mikill snjór á þessari leið, mun meiri en við bjuggumst við,“ segir hún, en lætur annars vel af göngunni. Eva skellti sér til New York áður en hún byrjaði hjá Advania og var þar í rúma viku og heimsótti vini og ættingja þar.