Betri afkoma Icelandair Group

Búist er við því að rekstrarhagnaður (EBITDA) Icelandair Group fyrir árið 2015 verði á bilinu 2,7 milljörðum til 3,3 milljörðum meiri en gert hafði verið ráð fyrir í upphafi árs.

Þetta kemur fram í afkomutilkynningu Icelandair vegna annars fjórðungs. Rekstrarhagnaður félagsins á öðrum fjórðungi var 50,3 milljónir dala (6,7 milljarðar króna) og jókst um 5 milljónir dala frá öðrum fjórðungi í fyrra.

„Helsta skýringin á góðu gengi félagsins er arðbær innri vöxtur í millilandastarfsemi félagsins. Framboð í millilandafluginu var aukið um 15 prósent á fjórðungnum samanborið við síðasta ár og á sama tíma fjölgaði farþegum um 17 prósent,“ segir Björgólfur Jóhannsson, forstjóri Icelandair Group, í afkomutilkynningunni.

Björgólfur segir að sætanýting hafi verið um 81,8 prósent og aukist um 1,8 prósentustig á milli ára.

„Þá hefur lækkun eldsneytisverðs á milli ára jákvæð áhrif á afkomuna. Rekstur annarrar starfsemi félagsins gekk einnig vel á fjórðungnum,“ segir forstjóri Icelandair.