Nágrannar nígeríska karlmannsins sem grunaður er um að hafa haft óvarin kynmök við konur á Íslandi vitandi að hann væri smitaður af HIV-veirunni hafa margir orðið varir við mikinn umgang um íbúð hans síðustu mánuði. Að sögn nágrannanna sést oft til ungra kvenna fara inn í íbúðina.

Maðurinn var úrskurðaður í gæsluvarðhald til 20. ágúst í Héraðsdómi Reykjavíkur á fimmtudaginn. Þeim úrskurði hefur verið áfrýjað til Hæstaréttar.

Maðurinn er hælisleitandi og hefur verið hér á landi í um eitt ár. Hann er búsettur ásamt sambýlismanni í fjölbýlishúsi í eigu Reykjavíkurborgar í Hlíðunum og hefur búið þar í um sjö mánuði.

Lögreglan rannsakar nú málið og voru rannsóknarlögreglumenn við störf að heimili mannsins um miðjan dag í gær. Lögreglan fór inn í íbúðina um stund og tók skýrslu af sambýlismanninum.
Lögreglan segir rannsóknina snúa meðal annars að því að skoða hvort fleiri konur kunni að hafa átt samneyti við manninn og hvort þær séu smitaðar. 
Á annan tug kvenna eru á lista yfir þá sem verið er að reyna að hafa samband við vegna málsins. Samkvæmt heimildum Fréttablaðsins er að minnsta kosti ein kona smituð. 

Sambýlismaður hins grunaða vissi ekki að maðurinn væri smitaður af HIV-veirunni. Hann segist ekki hafa þekkt manninn vel en staðfestir að ungar konur hafi verið tíðir gestir og að hann neyti fíkniefna. 

Upp komst um málið eftir að erlend kona, fyrrverandi kærasta mannsins, hafði samband við íslenska stúlku sem hún vissi að hann hefði átt kynferðislegt samneyti við. Stúlkan leitaði til læknis þann 13. júlí síðastliðinn sem tilkynnti um málið til embættis sóttvarnalæknis. „Eftir það fóru hlutirnir af stað. Það er algjörlega eðlilegt að svona hlutir taki tíma og það hefur verið unnið hratt í málinu,“ segir Haraldur Briem, fráfarandi sóttvarnalæknir, og bætir við að samkvæmt lögum sé skylda á mönnum að tilkynna lækni ef grunur vaknar um að einstaklingur sé haldinn alvarlegum sjúkdómi. „Nú gengur þetta út á að ná til allra sem geta hafa smitast,“ segir Haraldur. 

„Við hjónin kvörtuðum nokkrum sinnum vegna hans. Það var stanslaus umgangur þarna og alltaf mjög mikil læti,“ segir Malsor Tafa, nágranni mannsins. Malsor er hælisleitandi frá Kósóvó og býr ásamt fjölskyldu sinni í íbúð við hliðina á íbúð mannsins. 

„Það hefur verið ömurlegt að búa hérna með börn. Ég vissi alltaf að það væri eitthvað skrítið í gangi.“
Að sögn Malsors var umgangur um íbúðina á hverjum degi.

Guðmundína Ragnarsdóttir, lögmaður mannsins, segir að hann haldi því fram að hafa ekki vitað að hann væri með veiruna.