Undrast að matur sé ekki með

Bjarni Benediktsson fjármálaráðherra hefur boðað afnám tolla af tæplega tvö þúsund vörutegundum. Markmiðið er að lækka vöruverð og bæta samkeppnishæfni seljenda á innlendum markaði.

Ekki stendur til að lækka tolla á matvöru í þessum tillögum fjármálaráðherra. Ólafur Þ. Stephensen, framkvæmdastjóri Félags atvinnurekenda, undrast að matvara skuli vera undanskilin í þessum tillögum. „Við fögnum að sjálfsögðu afnámi tolla en skiljum ekki af hverju matvara sé þar undanskilin. Það gilda engin önnur lögmál um kaup og sölu á matvælum en öðrum vörutegundum,“ segir Ólafur.

„Tollar hafa hamlandi áhrif á viðskipti og draga úr alþjóðaviðskiptum í heild sinni. Þegar tollur er lagður á innflutta vöru hækkar verðið sem innlendir neytendur þurfa að greiða fyrir vöru,“ segir í tilkynningu frá fjármálaráðuneytinu.

Bjarni tjáði sig um málið á Facebook-síðu sinni í gær þar sem hann sagði verslun með föt og skó eiga sér stað erlendis. „Almenn vörugjöld hafa verið aflögð. Tiltekt í tollum er næst á dagskrá. Þetta eru afar mikilvæg framfaraskref fyrir neytendur, verslun og viðskipti,“ skrifaði Bjarni.