Endurfjármagna átta milljarða króna lán

Arion banki lauk í gær skuldabréfaútgáfu í norskum krónum. Samtals voru gefin út skuldabréf fyrir 500 milljónir norskra króna (8,3 milljarða íslenskra króna) til fimm ára. Skuldabréfin bera fljótandi NIBOR-vexti að viðbættu 2,95% vaxtaálagi.

Arion banki hefur á sama tíma gert skiptasamning sem þýðir að hluta vaxta og höfuðstóls er skipt í evrur. Vaxtakjör í evrum eru fljótandi EURIBOR að viðbættu 2,74% vaxtaálagi. Skuldabréfin voru seld til fjárfesta í Noregi, Svíþjóð, Finnlandi, Danmörku og á meginlandi Evrópu. Í tilkynningu kemur fram að Pareto Securities sá um sölu skuldbréfanna og var umframeftirspurn í útboðinu.

Samhliða skuldabréfaútgáfunni nú hefur Arion banki keypt til baka 260 milljónir norskra króna af skuldabréfaútgáfu frá árinu 2013. Bankinn hafði áður keypt 59 milljónir og hefur hann því samtals keypt 319 milljónir norskra króna til baka af 500 milljón króna útgáfu frá árinu 2013.

Arion banki greiddi einnig í gær um 10 milljarða króna fyrir gjalddaga af víkjandi láni frá ríkissjóði. Þetta er í annað sinn á þessu ári sem bankinn greiðir fyrirframgreiðslu af víkjandi láni og hefur samtals greitt um 20 milljarða af um 30 milljarða víkjandi láni. Lánið var veitt í upphafi árs 2010 í tengslum við endurfjármögnun bankans.