Sigurður Einarsson í hundruð milljóna skattadeilu við ríkið

Sigurður Einarsson, fyrrverandi stjórnarformaður Kaupþings, hefur stefnt íslenska ríkinu fyrir Héraðsdóm Reykjavíkur til að fá úrskurði Ríkisskattstjóra og Yfirskattanefndar til að fá skattlagningu á kauprétti hans hjá Kaupþingi á árunum 2006 til 2008 hnekkt.

Sigurður Einarsson telur að kaupréttirnir sem hann nýtti sér hafi verið skattskyldir í Bretlandi þar sem hann var búsettur og hann hafi þegar greitt það sem honum ber þar í landi. Þetta féllust íslensk skattayfirvöld ekki á.

Tapi Sigurður málinu mun hann líklega þurfa að greiða yfir 700 milljónir króna í tekjuskatt þar sem kaupréttir eru skattlagðir sem laun.

Skattstofninn miðast við mismun markaðsgengis hlutabréfanna og þess gengis sem kveðið er á í kaupréttarsamningunum en Sigurður keypti hlutabréfin á genginu 303. Árið 2006 keypti Sigurður 1.624 þúsund hluti og 812 þúsund hluti bæði árin 2007 og 2008.

Ríkisskattstjóri segir skattstofn vegna kaupréttanna nema 1,6 milljörðum króna.

Þá bætti embættið 25 prósenta álagi við skattstofninn þar sem Sigurður gerði ekki grein fyrir tekjunum hér á landi. Samanlagt nemur skattstofninn því tveimur milljörðum króna.

Sigurður byggir málarekstur sinn á því að hann hafi notið kaupréttanna á grundvelli ráðningarsamnings sem hann, einn stjórnarmanna, hafði gert við Kaupþing og fólst m.a. í störfum fyrir Kaupþing í Bretlandi.

Ríkisskattstjóri og Yfirskattanefnd telja hins vegar að kaupréttirnir séu hluti af hefðbundnum launagreiðslum hans fyrir störf hans sem stjórnarformaður Kaupþings og því skattskyld hér á landi.

- ih