Sjáðu breytingarnar á Keflavíkurflugvelli

Umtalsverðar breytingar hafa átt sér stað á Flugstöð Leifs Eiríkssonar að undanförnu. Ljósmyndari fréttastofunnar fór á dögunum suður með sjó og fangaði hina nýju flugstöðvarbyggingu en hana má sjá hér að ofan. 

Frá árinu 1958 hefur fjöldi farþega sem fer um flugstöðina 90 faldast,  farið úr 44 þúsundum á ári í rétt tæpar fjórar milljónir árið 2014. Þá er ráð fyrir að farþegar flugstöðvarinnar verði fjórar og hálf milljón í ár og munu 20 flugfélög fljúga um völlinn í sumar.

Farþegaaukning hefur verið mest síðastliðin sex ár þar sem rúmlega hundrað prósenta aukning hefur orðið á fjölda farþega síðan árið 2009. Þessi hraða aukning hefur átt sér stað án sérstakra breytinga á flugstöðinni eða vellinum. Vegna þessarar miklu farþegaaukningar var ráðist í fyrrnefndar breytingar.

Nú þegar eru hafnar stækkunarframkvæmdir bæði á komusal og suðurhluta flugstöðvarinnar, samtals um 6.000 fermetrar. Ný þróunaráætlun til ársins 2040 er í mótun og mun hún taka á öllu skipulagssvæði flugvallarins og nærumhverfi hans. Áætlunin gerir m.a. ráð fyrir  að á þessum 25 árum muni stærð flugstöðvarinnar tvöföldast og ný norður-suður flugbraut lögð vestan við flugvöllinn.

Einnig hefur verið unnið að miklum breytingum á verslunar- og veitingasvæði flugstöðvarinnar sem ljúka mun formlega í dag. Svæðið hefur verið stækkað og veitingastöðum hefur verið fjölgað þannig að flugstöðin geti þjónað þeim aukna fjölda farþega sem búist er við á næstu árum. Með breytingunum mun úrval og framboð vöru og veitinga í flugstöðinni aukast sem skilar flugvellinum auknum leigutekjum.