Telja samanburðinn vera óraunhæfan

Opinberir starfsmenn njóta betri lífeyrisréttinda, ríkara starfsöryggis, ríflegri veikinda- og orlofsréttinda, betri tækifæra til endur- og símenntunar og aukinna starfsaldurstengdra réttinda samanborið við starfsfólk á almennum vinnumarkaði. Þetta segir í nýju áliti Viðskiptaráðs Íslands um réttindi og kröfur opinberra starfsmanna.

Af þessari ástæðu geti opinberir starfsmenn ekki borið sig saman við launþega á almennum markaði í launakröfum sínum.

Viðskiptaráð telur að grundvöllur þess að ræða megi sérstakar launahækkanir opinberra starfsmanna, umfram laun á almennum markaði, sé að umframréttindi fyrrnefnda hópsins verði afnumin.

„Það hefur aldrei verið sýnt fram á það með fullnægjandi hætti að launakjör opinberra starfsmanna séu lakari. Slíkur samanburður þyrfti alltaf að taka tillit til þessara réttinda,“ segir Björn Brynjúlfur Björnsson, hagfræðingur Viðskiptaráðs Íslands.

Það er mat Viðskiptaráðs að ef laun félaga í BHM myndu hækka um 20 prósent umfram laun á almennum markaði, án þess að afnema umframréttindin, myndi afkoma hins opinbera versna um 51 milljarð króna á ári. Það bil myndi þurfa að brúa með uppsögnum opinberra starfsmanna, skertri þjónustu eða verulegum skattahækkunum.