Íslendingar kaupa vörur á netinu fyrir sjö milljarða á ári

Velta íslenskrar netverslunar var um 3,5 milljarðar króna árið 2013, sem nemur um 1% af smásöluveltu á Íslandi það árið.

Þetta kemur fram í nýrri rannsókn á íslenskri netverslun en það eru Rannsóknasetur Verslunarinnar og Háskólinn á Bifröst sem koma að gerð skýrslunnar.

Hlutfallið er mun lægra en áætlað hlutfall netverslunar í nágrannalöndum okkar, þar sem hún er áætluð um 6% af heildarveltu. Áætlað er að Íslendingar kaupi vörur frá erlendum netverslunum fyrir svipaða fjárhæð og nemur veltu innlendrar netverslunar, eða um 3,5 milljarða.

Megintilgangur skýrslunnar er að gefa verslunarrekendum yfirsýn yfir þróun íslenskrar netverslunar í samanburði við erlendar netverslanir og leitast við að skýra sóknarfærin.

Skýrslan ber nafnið Íslensk netverslun – greining á stöðu og framtíðarhorfur og í henni er er lýst umfangi og þróun íslenskrar netverslunar á síðustu árum og hún borin saman við netverslun í nágrannalöndum okkar. Einnig er fjallað um hvernig ætla má að netverslun þróist á næstu árum og tengsl hennar við rekstur hefðbundinna verslana

Ein helsta ástæðan fyrir minna umfangi íslenskrar netverslunar en í nágrannalöndum okkar er talin vera lítill markaður hér á landi sem gerir verslunum erfitt um vik að bjóða vöruverð samkeppnishæft við erlendar stórverslanir. 

Hin megin ástæðan, sem verslunareigendur nefna, er sú nálægð sem flestir landsmenn hafa við hefðbundnar verslanir. Möguleikar íslenskra netverslana til að stækka felast meðal annars í að ná til stærri markaðssvæða og nýta þar með þær alþjóðlegu tengingar sem netverslun hvílir á.

Sífellt dregur úr mun á milli aldurshópa og kynja sem kaupa vörur um netið. Það eru helst konur í elsta aldurshópnum sem kaupa síður um netið en aðrir hópar. 

Vöruval höfðar þó misjafnlega til mismunandi hópa. Þannig eru fatakaup um netið vinsælli meðal ungra kvenna á meðan ungir karlar kaupa frekar raftæki og tölvubúnað.

Höfundar skýrslunnar eru Stefán Kalmansson og Emil B. Karlsson.