Rúmir tveir milljarðar í hagnað

Kaupfélag Skagfirðinga (KS) hagnaðist um 2,1 milljarð króna á síðasta rekstrarári. Er hagnaðurinn í fyrra um fjögur hundruð milljónum hærri en árið þar á undan þegar hagnaðurinn nam 1,7 milljörðum.

Þórólfur Gíslason, kaupfélagsstjóri KS, segir rekstur fyrirtækisins hafa gengið með ágætum í fyrra þó að heildarvelta fyrirtækisins hafi dregist saman frá síðasta rekstrarári. Heildarvelta fyrirtækisins var tæpir 27 milljarðar, sem er lækkun um fimmtán hundruð milljónir frá fyrra ári.

Þórólfur segir lækkunina stafa af minni veltu í sjávarútvegi þar sem einn togari var seldur á árinu sem og að annar togari fiskaði ekki nema í átta mánuði vegna breytinga.

Eigið fé Kaupfélagsins nam í árslok 23,7 milljörðum króna og er eiginfjárhlutfall um 68 prósent. Kaupfélag Skagfirðinga er samvinnufélag í blönduðum rekstri með til að mynda bæði kjötafurðastöð og útgerðarfélag.