Vill betra lánshæfi ríkissjóðs

„Þetta gæti verið mikið tækifæri fyrir ríkissjóð, heimilin og atvinulífið ef lánakjör ríkissjóðs batna,“ segir Steinþór Pálsson, bankastjóri Landsbankans, um lánshæfismat íslenska ríkisins.

Ríkissjóður greiddi ríflega 85 milljarða í vexti á síðasta ári og stefnir í annað eins á þessu ári. Vaxtagreiðslurnar nema 13 prósentum af heildarútgjöldum ríkissjóðs.

Með bættu lánshæfismati myndu þessar greiðslur lækka að sögn Steinþórs.

Bætt lánshæfismat væri einnig til hagsbóta fyrir fyrirtæki og einstaklinga.

„Um leið og ríkið hækkar í lánshæfi má búast við að stórir aðilar á borð við bankana hækki líka sem gerir að verkum að þessir aðilar geta tekið lán á hagstæðari kjörum erlendis með sama hætti og ríkið. Þessir bankar munu svo geta veitt sínum viðskiptavinum betri kjör. Svo eru stórir aðilar á borð við Landsvirkjun og Orkuveituna sem ættu möguleika á að fá betri kjör erlendis,“ segir Steinþór.