Tekjur Faxaflóahafna hærri og gjöld lægri en ætlað var

Afkoma Faxaflóahafna sf. var betri á síðasta ári en gert var ráð fyrir í fjárhagsáætlun. Tekjur voru 220,9 milljónir króna umfram áætlun en rekstrarútgjöld voru 56,2 milljónum undir áætluðum útgjöldum.

Þá voru fjármagnsliðir undir því sem áætlað var í fjárhagsáætlun og skýrist það af lækkun lána og óverulegri verðbólgu. Rekstrarhagnaður fyrir fjármagnsliði varð því 277 milljónum króna meiri en gert hafði verið ráð fyrir. Ástæða lægri gjalda skýrist af minni eignagjöldum og lægri afskriftum eigna en gert var ráð fyrir.

Rekstrartekjur Faxaflóahafna fyrir árið 2014 voru 3,05 milljarðar króna og hækkuðu um 7,2 prósent á milli áranna 2013 og 2014. Allir tekjuliðir voru umfram það sem áætlað var. Mestur var munurinn í vörugjöldum, sem voru 58,7 milljónum yfir áætlun. Rekstrargjöld Faxaflóahafna árið 2014 voru 2,4 milljarðar króna og hækka um 139 milljónir króna, þótt þau hafi verið undir áætlun.

Eignir Faxaflóahafna voru 13,2 milljarðar króna í lok árs 2014 og varð ekki veruleg breyting á milli ára. Fastafjármunir eru 11,7 milljarðar króna, langtímakröfur lækka um 178 milljónir og veltufjármunir hækka um 298 milljónir.