Yfir 200 milljónir söfnuðust á 5 árum

Samtals söfnuðust um 205 milljónir króna í Mottumars á árunum 2010 til 2014, eða í fimm söfnunum. Mest fékkst árið 2010 eða 50 milljónir króna. Árið 2011 fengust 39 milljónir og 2012 og 2013 fengust 36 milljónir. Í fyrra söfnuðust svo 43,5 milljónir króna. Ragnheiður Haraldsdóttir, forstjóri Krabbameinsfélagsins, segir að Mottumars sé svolítið sérstök söfnun.

„Bleiki mánuðurinn er alþjóðleg söfnun. Mottumars er okkar,“ segir Ragnheiður. Hún segir að Mottumarsátakið hafi farið fram í átta ár og það hafi tekið svolítinn tíma að koma söfnuninni í gang. „Það er svolítið erfiðara að virkja fólk í Mottumars en í Bleika mánuðinum. Það er sterkari hefð fyrir Bleika mánuðinum og svo eins og margir vita þá hafa konur meiri áhuga á að leggja svona verkefnum lið,“ segir Ragnheiður. Þrátt fyrir þetta hafi gengið vel með Mottumars. „Á upphafsárunum þurfti að leggja svolítið mikinn kraft í að koma þessu af stað en núna siglir þetta áfram í góðum gír má segja,“ segir hún.

Ragnheiður segir að í stórum dráttum megi segja að um það bil 50 prósent af söfnunarfénu í Mottumars renni til fræðslu- og árveknistarfa. „Til vísindarannsókna eru því miður bara 10 prósent,“ segir Ragnheiður og bætir því við að 30 prósent renni til ráðgjafarþjónustu Krabbameinsfélagsins sem rekur íbúðir hér í bænum og þjónustuíbúðir úti um landið og mikla ráðgjöf í húsnæði Krabbameinsfélagsins.

„Við stefnum oftast að því að halda beinum kostnaði við Mottumars undir 10 prósentum,“ segir hún. Ragnheiður segir að af þeim 43 milljónum sem söfnuðust í fyrra hafi 27 milljónir safnast á áheitasíðunni. „Við stefnum að því að halda þessu svipuðu allavega og erum svo sem ekkert svartsýn á það. En erum alltaf bara þakklát fyrir það sem við fáum og miðum starfsemina við það sem við höfum í höndunum,“ segir Ragnheiður.