Með mikinn áhuga á veiði og körfubolta

Georg Andersen hefur tekið við starfi framkvæmdastjóra Inkasso. Georg var áður framkvæmdastjóri Kaptura ehf., móðurfélags Inkasso ehf.

Kaptura hét áður DCG ehf. og átti í byrjun síðasta árs meðal annars félögin Hópkaup, Heimkaup, Inkasso og Leit.is. „Þetta á sér nú ákveðinn bakgrunn upp úr sprotahugsun þar sem hugbúnaðarnördarnir voru að spinna út hitt og þetta. Ég kom inn í móðurfélagið í ársbyrjun í fyrra til þess að taka svona nýja stefnu, þrengja sýnina á það sem við vorum að gera,“ segir hann. Á sama tíma voru sprotainternetfyrirtæki, sem sáu um kaup og sölu á netinu, aðskilin frá. „Ég fór í gegnum þetta með móðurfélaginu og við erum búin að selja Hópkaup og Heimkaup og fókusera á Inkasso og svo höfum við startað fleiri fyrirtækjum eins og Faktoríu sem sér um skammtímafjármögnun fyrirtækja,“ segir Georg.

Georg starfaði áður sem svæðissölustjóri hjá Marel hf., forstöðumaður fjárfestatengsla og samskiptasviðs Straums-Burðaráss fjárfestingabanka, framkvæmdastóri GottKort ehf. og framkvæmdastjóri Valafells ehf. Auk þess að vera framkvæmdastjóri Inkasso er Georg framkvæmdastjóri Faktoríu, nýs fyrirtækis sem veitir fyrirtækjum skammtímalán. Faktoría er dótturfélag Inkasso.

Georg lærði útflutnings- og tæknifræði með áherslu á alþjóðamarkaðsfræði í Danmörku. „Ég á mér danskar rætur og fannst tilvalið að læra í Danmörku,“ segir hann. Einnig tók hann MBA í Háskólanum í Reykjavík.

Eiginkona Georgs er Gyða Hlín Björnsdóttir og eiga þau samtals fimm börn. Georg átti tvö fyrir, Gyða Hlín tvö og svo eiga þau eitt barn saman. Þau eiga bæði rætur að rekja til Snæfellsness og fara þangað oft. Hann segist hafa gengið á Snæfellsjökul en sé annars ekki mikill göngumaður. „Áhugamálin eru silungsveiði og laxveiði og á veturna er það körfubolti,“ segir hann. Hann hafi verið dómari í 20 ár og dæmi í úrvalsdeild. „Ég lít á þetta sem hobbí og er þess vegna ekki að dæma eins mikið og þeir sem eru að djöflast í þessu sem mest,“ segir Georg. Dómgæslan haldi sér í formi og þar sé góður félagsskapur. Hann segist því vera nokkuð virkur í sportinu og hafa spilað á yngri árum, með Breiðabliki og stúdentum.

Georg segist horfa reglulega á NBA-leiki, íslenska boltann og aðeins á Evrópuboltann. Það séu sterk félög á Spáni og í Þýskalandi. Hann ætlar á Evrópumeistaramótið í sumar, þar sem íslenska landsliðið tekur þátt.