Negla frá Nintendo

Nintendo gaf út fjórða leikinn í Super Smash Bros.-röðinni núna í haust, bæði fyrir 3DS og WiiU-leikjatölvur.

Leikurinn nær að koma á framfæri þrjátíu ára tölvuleikjasögu á frábæran hátt með um fimmtíu persónum af öllum stærðum og gerðum. Þær búa allar yfir eiginleikum sem endurspegla þá klassísku leiki sem þær eru þekktar úr. Meðal annarra eru þarna hundurinn úr Duck Hunt, boxarinn úr Punch-Out, jógakennarinn úr Wii Fit, Sonic og Shamus úr Metroid. Stórskemmtilegt gallerí og listinn heldur áfram.

Það er erfitt að finna leiki sem bjóða upp á jafn mikið stuð og Super Smash Bros. Nintendo hefur nostrað við hvert smáatriði sem gæðir hann miklu lífi. Leikurinn er troðinn af alls kyns keppnum og smáleikjum þar sem hægt er að keppa við tölvuna. Aðalsmerki Smash Bros. eru þó vitanlega slagsmálin milli spilara sem eru heima í stofu.

Leikurinn býður meðal annars upp á keppni milli hvorki meira né minna en átta spilara, sem er um það bil það klikkaðasta sem hægt er að komast í. Í netspilun geta fjórir spilarar tengst og barist sín á milli.

Hægt er að nota allar gerðir af Wii-fjarstýringum fyrir leikinn og virka þær allar mjög vel á sinn hátt. Það er meira að segja hægt að tengja 3DS-tölvu við WiiU-tölvuna og nota hana til að stýra í leiknum. Hvað 3DS-útgáfuna varðar þá er hún einnig frábær og býður upp á mikla spilun rétt eins og stóri leikurinn.

Niðurstaða:Algjörlega frábær leikur. Skyldueign fyrir þá sem eiga WiiU eða 3DS.