Íhuga að sækja rétt sinn vegna innheimtu sykurskatts

Samtök verslunar og þjónustu (SVÞ) telja fyrirkomulag við innheimtu sykurskatts hér á landi hafa falið í sér mismunun á milli innlendra framleiðenda og innflytjenda. Vegna þessa segir SVÞ að innflytjendur gætu átt bótarétt á hendur íslenskum stjórnvöldum sökum tjóns sem þeir kunna af hafa orðið fyrir vegna þessarar mismununar.

Sykurskatturinn var aflagður um síðustu áramót þegar lög um vörugjald voru felld niður. „Eftir standa þó álitamál um hvort þáverandi innheimta sykurskattsins hafi falið í sér mismunum hvað varðar innheimtu þeirra gjalda,“ segir í tilkynningu frá SVÞ.

SVÞ segja að mismunun hafi falist í að innlendum framleiðendum hafi staðið til boða að greiða umrædd vörugjöld eftir á og í samræmi við það magn sem sannarlega var nýtt hverju sinni. „Þannig þurfti ekki að greiða fyrir þær vörur sem t.d. döguðu uppi á lager framleiðenda. Hins vegar bar innflytjendum að greiða við innflutning vörugjald á fullunnum vörum og taka um leið á sig öll afföll sem verða á hinni gjaldskyldu vöru.“

SVÞ telja fyrirkomulag fela í sér verulega mismunum varðandi framkvæmd gjaldtökunnar sem væri illsamræmanleg þeirri meginreglu ákvæða EES-samningsins um að gjöld skulu falla jafnt á alla, óháð framleiðslulandi.

Í kjölfar kvörtunar SVÞ leitaði ESA skýringa hjá íslenskum stjórnvöldum varðandi umrædda gjaldtöku og hugsanlegt misræmi varðandi hana. Á meðan rekstur málsins stóð yfir hjá ESA voru lög um vörugjald afnumin og umrædd gjaldtaka þannig felld úr gildi. Í ljósi þess taldi ESA ekki lengur vera til staðar hætta á mismunun og því má gera ráð fyrir að málinu verði lokið að svo stöddu af hálfu ESA samkvæmt því sem segir í tilkynningu frá SVÞ.

SVÞ telja hins vegar að umfjöllun ESA um málið feli í sér viðurkenningu á því að umrædd gjaldtaka hafi falið í sér mismunun. „Þessu til viðbótar er það einnig vafa undirorpið hvort og hvernig þessi framkvæmd samrýmist jafnræðisreglu stjórnsýsluréttarins sem og jafnréttisákvæði stjórnarskrárinnar,“ segja SVÞ.