Nýrri búð fagnað í Reykhólasveit

Flaggað var á Reykhólum í gær þegar verslun var opnuð þar á ný. Sveitarstjórinn Ingibjörg Birna Erlingsdóttir mætti með blómvönd og færði verslunareigendunum, þeim Ásu Fossdal og Reyni Þór Róbertssyni, og óskaði þeim velfarnaðar, að því er Reykhólavefurinn greinir frá.

Þar með var þriggja mánaða verslunarleysi byggðarinnar rofið. Nýja búðin heitir Hólabúð og er í sama húsi og áður hýsti Hólakjör, sem var lokað um síðustu áramót. Var það áfall fyrir samfélagið enda langt að sækja í næstu búðir á Hólmavík, 58 kílómetra í burtu, og í Búðardal, en þangað eru 75 kílómetrar.

Sveitarstjórn Reykhólahrepps greip til þess ráðs að auglýsa eftir aðila sem væri tilbúinn að taka að sér að reka matvöruverslun á Reykhólum. Þau Ása og Reynir Þór gáfu sig fram og ákváðu að flytja úr Njarðvík vestur í Reykhólasveit og gerast kaupmenn. Þau höfðu bæði reynslu af verslunarrekstri í Reykjanesbæ.  

Fyrst um sinn verður Hólabúð opin virka daga milli klukkan 10 og 18 og laugardaga milli klukkan 10 og 16 en lokað verður á sunnudögum. Á Reykhólum búa um 130 manns og í Reykhólahreppi alls um 270 manns.