Gísli Gíslason sýknaður af 155 milljóna kröfu

Gísli Gíslason lögfræðingur hefur verið sýknaður af kröfum Glitnis, Íslandsbanka og Arion banka í Héraðsdómi Reykjavíkur. Bankarnir kröfðust 155 milljóna króna skaðabóta vegna aðkomu Gísla að sölu húsnæðisins við Skúlagötu 51 árið 2009.

Kínverska sendiráðið á Íslandi keypti húsið af félagi í eigu Karls Steingrímssonar athafnamanns, sem oftast er kenndur við Pelsinn, og Arons Péturs, sonar hans, fyrir um 855 milljónir króna. Bankarnir stóðu hinsvegar í þeirri trú að til stæði að selja húsið til indverskra fjárfesta fyrir mun lægra verð, 550 milljónir, gegn því að bankarnir afléttu kröfum sínum af húsinu.

Gísli gerði tilboð í fasteignina fyrir hönd fjárfestanna frá Indlandi. Bankarnir stefndu Gísla og segir í stefnu þeirra að honum hefði átt að vera ljóst að verið væri að blekkja bankanna. Héraðsdómur taldi hinsvegar ósannað að Gísli hefði haft vitneskju um blekkinguna og er bönkunum gert að greiða honum eina milljón króna í málskostnað.

„Telur dómurinn að ekki hafi verið færðar nægar sönnur á það að stefndi hafi vitað, eða mátt vita, að þessi erindrekstur hans væri liður í ólögmætri blekkingu eiganda fasteignarinnar við að fá veðunum aflétt gegn greiðslu á mun lægri fjárhæð en í raun fékkst við sölu hennar,“ líkt og segir í dómsorðum.

„Þá verður ekki fram hjá því litið að stefnendum [bönkunum] var vel kunnugt um efni kauptilboðsins, sem lá til grundvallar yfirlýsingu þeirra, og mátti þeim því vera ljóst að seljandi fasteignarinnar gæti horfið frá því að selja Auro Investment Partners LLC [indversku fjárfestanna] eignina ef hærra tilboð bærist í hana.“

Gísli Gíslason er landsmönnum meðal annars kunnugur sem innflytjandi og áhugamaður um rafmagnsbíla, sem og fyrir áætlanir sínar um að verða fyrsti Íslendingurinn út í geim, en hann á miða í fyrirhugaða ferð geimskutlu Virgin Galactic.