Vinstri græn hafna olíuvinnslu og hvalveiðum

Landsfundur Vinstri hreyfingarinnar græns framboðs samþykkti á fundi sínum á Selfossi að hafna með öllu olíuvinnslu við Íslandsstrendur.

Í ályktuninni segir að: „Landsfundur ítrekar mikilvægi þess að horfið verði af þessari braut olíuvinnslu og nýtingar og hvetur stjórn, þingflokk, sveitarstjórnarfólk og félagsmenn alla til dáða í einarðri baráttu fyrir umbreytingu Íslands í samfélag án jarðefnaeldsneytis. Þannig getum við verið sjálfum okkur samkvæm og veitt öðrum þjóðum gott fordæmi."

Ályktunin er þó breytt útfærsla á upphaflegri tillögu þar sem hreyfingin baðst afsökunar á því að ráðherra flokksins hafi árið 2013 undirritað sérleyfi til olíuvinnslu. Er þar átt við Steingrím J Sigfússon en hann var atvinnuvegaráðherra þegar leyfin voru gefin út.

„Hreyfing sem ekki beitir sér eindregið gegn nýtingu jarðefnaeldsneyta getur ekki með réttu látið kenna sig við grænt framboð."

Þá leggst hreyfinginn gegn hvalveiðum Íslands og segir í ályktun að greinin muni ekki ná fyrri stöðu innan atvinnulífsins og að litlar líkur séu á að hvalveiðar öðlist viðurkenningu alþjóðastofnana.

„Við veiðarnar er beitt ómannúðlegum veiðiaðferðum til að viðhalda áhugamáli örfárra útgerðarmanna. Háum upphæðum af opinberu fé hefur verið kastað á glæ til að styrkja þessa áhugamenn um hvalveiðar. Nú er mál að linni," segir í samþykkt fundarins.