Persónuvernd lýkur athugun sinni á morgun

Gísli Freyr Valdórsson og Sigríður Björk Guðjónsdóttir fá niðurstöður athugunnar Persónuverndar á samskiptum þeirra á morgun. Niðurstöðurnar verða svo birtar almenningi á mánudag. Þetta segir Þórður Sveinsson, lögfræðingur hjá Persónuvernd, í samtali við Vísi en Kjarninn greindi frá þessu í morgun.

Persónuvernd hefur haft samskipti Gísla Freys, fyrrverandi aðstoðarmanns Hönnu Birnu Kristjánsdóttur innanríkisráðherra, og Sigríðar Bjarkar, fyrrverandi lögreglustjóra á Suðurnesjum og núverandi lögreglustjóra á höfuðborgarsvæðinu, í kringum lekamáli til skoðunar. Fyrir liggur að Sigríður afhenti Gísla Frey upplýsingar sem hann átti ekki rétt á.