Eyrir Sprotar lýkur fjármögnun

Sprota og vaxtasjóður Eyrir Invest hefur lokið fyrsta áfanga fjármögnunar með þátttöku öflugra fagfjárfesta. Eyrir Sprotar hafa nú þegar fjárfest í nokkrum nýsköpunarverkefnum og fjölmörg verkefni til viðbótar eru í skoðun hjá sjóðnum. Þetta kemur fram í tilkynningu frá Arion banka.

Eyrir Sprotar er rekinn af Eyrir Invest í samstarfi við Arion banka, en Eyrir og Arion banki eru stærstu hluthafar sjóðsins. Arion banki hefur stutt við nýsköpunarumhverfið á Íslandi á undanförnum árum m.a. með því að skipuleggja frumkvöðlahraðalinn Startup Reykjavík og með öflugum stuðningi við frumkvöðla.

Aðrir fjárfestar eru lífeyrissjóðir og fagfjárfestar. Að loknum fyrsta áfanga fjármögnunar er stærð Eyris Sprota 2,5 milljarðar króna. Sjóðurinn á enn í viðræðum við nokkra áhugasama fjárfesta um þátttöku og er gert ráð fyrir að seinni hluta fjármögnunar verði lokað fljótlega. Arctica Finance annaðist umsjón með fjármögnun Eyris Sprota.

„Það er mjög ánægjulegt að ljúka þessum áfanga í fjármögnun“, segir Örn Valdimarsson framkvæmdastjóri Eyris Sprota.

Hann segir að sjóðurinn hafi verið að vinna í fjölmörgum áhugaverðum verkefnum undanfarna mánuði og fjármögnun sjóðsins gerir honum kleift að fylgja þeim verkefnum enn betur eftir.

„Við væntum þess ennfremur að geta sagt frá fleiri nýjum fjárfestingum innan skamms.“

Þórður Magnússon, formaður fjárfestingaráðs Eyris Sprota, segir nýsköpunarumhverfi á Íslandi í dag afar frjótt og spennandi. „Umhverfið sem á undanförnum árum hefur verið byggt upp á Íslandi til stuðnings nýsköpun og sprotafyrirtækjum er afar vel heppnað til að byggja upp tæknilega hæfni þessara fyrirtækja. Hins vegar hefur skort fjármuni og getu til að byggja upp sölu og dreifingarkerfi erlendis. Þessi fjármögnun og fjármögnun inn í aðra sprotasjóði bætir úr brýnni þörf til að styðja við uppbyggingu fyrirtækja framtíðarinnar.“

„Arion banki hefur lagt ríka áherslu á að styðja við nýsköpun á Íslandi, m.a. í gegnum verkefnin Startup Reykjavík og Startup Energy Reykjavík. Í gegnum þessi verkefni hefur Arion banki fjárfest í á fimmta tug nýsköpunarfyrirtækja. Okkur hefur hins vegar fundist vanta fjármögnunarkosti fyrir nýsköpunarfyrirtæki og því er sérstaklega ánægjulegt að koma að stækkun þessa sprota og vaxtasjóðs. Við höfum mikla trú á að þessi fjárfesting muni reynast bankanum arðsöm“, segir Höskuldur H. Ólafsson bankastjóri Arion banka hf.

Mikil reynsla í fjárfestingaráði

Í fjárfestingaráði Eyris Sprota sitja auk Þórðar, Hilmar Bragi Janusson, Kristín Guðmundsdóttir  og  Magnús Ingi Óskarsson. Hilmar er forseti Verkfræði- og náttúruvísindasviðs Háskóla Íslands og fyrrum framkvæmdastjóri vöruþróunar og rannsóknarstarfs hjá Össuri hf.

Kristín  starfaði áður sem forstjóri og fjármálastjóri hjá Skiptum hf. og sem fjármálastjóri Granda hf. Magnús Ingi Óskarsson var einn stofnenda Calidris sem var selt til hugbúnaðarfyrirtækisins Sabre Airline Solutions árið 2010. Þórður Magnússon er stjórnarformaður Eyrir Invest hf. og hefur komið að uppbyggingu fjölmargra sprotafyrirtækja.

Auk þeirra hefur Eyrir Sprotar tengsl við marga aðra einstaklinga sem munu veita fyrirtækjum í eignasafni Eyris Sprota mikinn stuðning og aðhald. Þessir einstaklingar hafa allir mikla reynslu úr atvinnulífinu sem mun nýtast við tæknilega uppbyggingu og sölu og markaðsstarf þessara fyrirtækja. „Við væntum þess að  árangurinn láti ekki á sér standa. Það eru mörg góð og spennandi tækifæri í nýsköpunargeiranum í dag, sem við hjá Eyrir Sprotum hlökkum til að fá tækifæri til að skoða betur á komandi mánuðum“, segir Þórður.