5000 manns koma til Ísafjarðar í dag með skemmitferðaskipum

Tvö skemmtiferðaskip komu inn til Ísafjarðar snemma í morgun með samtals um 5000 farþega. Annað skipið er mun stærra en hitt, heitir MC Splendida og er á akkeri úti við höfnina. Um 4300 manns koma með því skipi og um 600 manns með minna skipi, Deautschland, sem liggur við bryggju.

Hálfdán Bjarki Hálfdánsson hjá upplýsingamiðstöð ferðamála á Ísafirði segir að það sé ærið verkefni fyrir 2700 manna bæjarfélag að taka á móti 5000 ferðamönnum á einum degi en að bærinn ráði engu að síður vel við þetta. Hann segir mikla vinnu við að markaðssetja Ísafjörð sem viðkomustað skemmtiferðaskipa farna að skila sér.

„Fyrsta skipið kom hingað seint í maí. Það koma alls 63 skip hingað í sumar og með þeim rúmlega 60.000 manns,“ segir Hálfdán.

Skipin tvö sem komu til Ísafjarðar í morgun fara þaðan aftur seinna í dag og halda för sinni áfram meðfram strönd landsins.

„Það er svona þumalputtareglan að skipin koma hingað snemma morguns og sigla aftur út í eftirmiðdaginn. Þau taka þá nóttina í að sigla annað hvort til Reykjavíkur eða Akureyrar.“