Kjálkabraut leikstjórnanda Jets og fær að vera fyrirliði gegn Jets

Þjálfari Buffalo Bills, Rex Ryan, er ákaflega stríðinn maður og hann er búinn að gera sitt gamla félag, NY Jets, brjálað fyrir leik liðanna annað kvöld.

Ryan þjálfaði Jets í fimm ár en var rekinn eftir síðasta tímabil. Hann var þá ráðinn sem þjálfai Bills.

Það varð allt vitlaust í herbúðum Jets í ágúst er IK Enemkpali kjálkabraut leikstjórnanda Jets, Geno Smith, er þeir voru að rífast um litla skuld inn í klefa. Smith hefur fyrir vikið ekkert spilað í vetur.

Enemkpali var rekinn frá Jets samdægurs. Daginn eftir var hann aftur á móti kominn með nýja vinnu. Ryan hafði samið við hann og það vakti litla kátínu hjá forráðamönnum Jets.

Þeir brostu líklega ekki mikið í gær er Ryan tilkynnti að téður Enemkpali yrði einn af fyrirliðum Bills í fimmtudagsleiknum gegn Jets.

Ryan neitar því að hann sé að stríða Jets. Hann einfaldlega leyfi mönnum að vera fyrirliðar gegn sínum gömlu félögum.

Fjörið á morgun gæti því byrjað áður en leikurinn hefst og áhugasamir ættu að stilla inn á leikinn nokkrum mínútum áður en hann hefst.