Eigendaskipti hjá Brynjuís yfirvofandi

Ísbúðin Brynja gæti skipt um eigendur á næstu dögum. Þetta herma heimildir Vísis.

Brynja hefur verið í eigu Fríðu Leósdóttur síðustu þrjá áratugina eða frá árinu 1985. Eigendur ísbúðarinnar vildu ekki tjá sig um málið er falast var eftir því en staðfestu að einhverjir væru að bera víurnar í verslunina.

Brynja hefur löngum verið rómuð sem ein besta ísbúð landsins og hlaut meðal annars þann titil í úttekt álitsgjafa Vísis á ísbúðum landsins síðla síðasta árs. Margir geta ekki farið til Akureyrar án þess að fá sér þeyting í Brynju og myndast oft löng biðröð við inngang Aðalstrætis þrjú.

Talið er að væntanlegir eigendur hafi í hyggju að opna útibú ísbúðarinnar sunnan heiða. Í raun yrðu fleiri en ein Brynja á höfuðborgarsvæðinu því fyrir er rekin verslun með þessu nafni í húsi að Laugavegi 29. Sú verslar hins vegar ekki með ís heldur ýmis konar verkfæri og áhöld.