Stelpur fá fría golfkennslu á mánudaginn

Golfsamband Íslands vinnur markvisst af því að auka áhuga ungra kvenna á golfíþróttinni og verkefnið Stelpugolf er liður í því en það fer nú fram annað árið í röð.

Nemar Golfkennaraskóla PGA héldu Stelpugolf fyrst í fyrra og það fer nú aftur fram næstkomandi mánudag, annan í hvítasunnu, milli klukkan tíu og eitt á svæði GKG við Vífilsstaði.

Ef marka má þátttökuna í fyrra þá er mikil eftirspurn er eftir degi sem þessum á meðal kvenkylfinga. Í fyrra komu hátt í 500 konur og sóttu sér kennslu. Útskriftanemar Golfkennaraskólans ætla nú að halda uppteknum hætti og halda verkefninu gangandi. Stelpugolf er því komið til að vera.

 

„Golfsamband Íslands hvetur stelpur á öllum aldri að líta við á Vífilsstaðavelli og nota þetta tækifæri til að bæta tæknina undir traustri leiðsögn golfkennara og jafnframt að bjóða vinkonum, dætrum eða mæðrum sem ekki eru í golfklúbb með sér á Stelpugolf 2015," segir í fréttatilkynningu frá Golfsambandi Íslands.

Hulda Birna Baldursdóttir, PGA kennari í golfi kom í Akraborgina og sagði Hirti Hjartarsyni frá átakinu Stelpugolf sem miðar að því að fjölga konum í golfi. Það má hlusta á allt viðtalið hér fyrir ofan en Hulda Birna segir þar meðal annars að stelpur frá fjögurra til hundrað ára geti fengið kennslu og aldurinn sé því enginn fyrirstaða.