Ráðvana ríkisstjórn

Hlutverk ríkisstjórnar er að þoka málum til farsældar fyrir þjóðina. Það er skylda ráðherra að vera til gagns almennt og ekki síst í sínum málaflokki. Ráðherrar skulu forðast að skaða orðspor sitt og ríkisstjórnarinnar í heild. Takist þetta þokkalega gagnast það bæði heimilum og fyrirtækjum í landinu.

Ráðherrum núverandi ríkisstjórnar hefur gengið illa að feta þá slóð sem lýst er hér að ofan. Raunar mætti ætla að alls ekki sé ætlun ráðherranna að vera almennt til gagns, þegar atferli þeirra í embætti á fyrri helmingi kjörtímabilsins er skoðað.

Engu líkara er en Jónas frá Hriflu sé nú genginn aftur og orðinn húsbóndi í stjórnarráðinu. Heldur er Hriflu-Jónas ferðaglaðari eftir dauðann en í lifanda lífi en þá hann heiðrar Ísland með nærveru sinni vill hann byggja yfir þingmenn eftir aldargömlu æfingaverkefni nemanda í arkitektúr milli þess sem hann sendir sms um styrki úr ríkissjóði til manna sem ekki sóttu um og sakar fjölmiðla um loftárásir á sig.

Fyrrverandi innanríkisráðherra hrökklaðist úr embætti vegna alvarlegrar spillingar og ósannsögli. Hún er nú aftur sest á þing þrátt fyrir að hún neiti enn að gefa þingnefnd skýringar á athæfi sínu í ráðherrastóli og í ljós hafi komið að hún varði milljónum af skattfé í einkaráðgjöf lögfræðinga og spunameistara fyrir sig vegna vandamála sem vörðuðu persónu hennar en ekki ráðuneytið.

Utanríkisráðherrann er kapítuli út af fyrir sig. Einn og óstuddur ætlaði hann að stilla til friðar í Úkraínu en án árangurs. Í Brüssel kemur hann sterkur inn sem bréfavinur ársins.

Umhverfisráðherrann nýi vill beita mildum þýðingum til að draga tennurnar úr regluverki ESB sem Ísland er skuldbundið til að lögfesta. Forsvarsmenn þýðingarfræðinnar í Háskóla Íslands hljóta að hlæja sig máttlausa.

Sjávarútvegsráðherrann rífur upp heilu stofnanirnar og flytur þær landshluta á milli og rennur svo á rassinn með allt saman. Þá snýr hann sér að því að gefa makríl fyrir milljarða til nokkurra útgerða.

Iðnaðarráðherrann rembdist eins og rjúpan við staurinn við að koma á náttúrupassa sem enginn vildi, ekki einu sinni hennar eigin flokksmenn. Þegar það rann út í sandinn smellti hún myndarlegri ívilnun á bleikjueldi hjá fyrirtæki sem tengist formanni hennar eigin flokks.

Menntamálaráðherrann er nýjasta klúður ríkisstjórnarinnar. Hann gerir aðför að menntun framhaldsskólanema milli þess sem hann aðstoðar leigusalann sinn við að markaðssetja sig í útlöndum.

Svona ríkisstjórn þokar ekki málum til farsældar – hvorki fyrir fyrirtækin né heimilin.

Skjóðan skrifar í Markaðinn í Fréttablaðinu á miðvikudögum. Hún er frekju- og leiðindaskjóða, sem lætur ekkert mannlegt sér óviðkomandi.