Hagnaður Nýherja umfram áætlun

Öll félög innan Nýherja samstæðunnar skiluðu hagnaði á fyrsta ársfjórðungi.

Heildarhagnaður samstæðunnar nam 41 milljón sem er örlítið minna en árið 2014 þegar hagnaðurinn nam 56 milljónum. Framlegð fyrirtækisins dróst einnig saman, úr 26,3% árið 2014 í 24,8% í ár. Hins vegar jukust tekjur félagsins um 14,1% milli ára. Rekstrarhagnaður nam 147 milljónum samanborið við 116 milljónir árið á undan. EBITDA félagsins nam 225 milljónum en var 191 milljón árið 2014.

Finnur Oddsson, forstjóri Nýherja segir reksturinn hafa gengið vel á ársfjórðungnum. „Samstæðan hefur nú skilað heilbrigðum hagnaði 5. ársfjórðunginn í röð, sem sýnir í reynd aukinn stöðugleika í rekstrinum. Töluverður tekjuvöxtur var frá sama tímabili í fyrra, sérstaklega hjá Nýherja og Tempo. Afkoma nú er lítillega yfir áætlunum. Við vinnum áfram að því að festa nýtt skipulag sem tók gildi síðasta haust í sessi og ná þeim markmiðum sem félagið setti sér um einfaldara skipulag, skilvirkara sölustarf og bætta þjónustu.“