Metmánuður hjá Icelandair og WOW

Sætanýting hjá íslensku flugfélögunum Icelandair og WOW air hefur aldrei verið jafn góð í febrúar eins og nú. Hjá Icelandair voru 77,7 prósent sætanna skipuð, en hlutfallið var 4,5 prósentum minna í febrúar í fyrra. Hjá WOW air var hlutfallið 88,5 og hefur það aldrei verið hærra.

Þetta kemur fram á vefnum Túristi.

Mun hærra hlutfall sætanna hjá WOW air var skipað á seinni hluta síðasta árs en á þeim fyrri. Á fyrri helmingi síðasta árs voru að meðaltali 76 prósent sætanna bókuð en á seinni hluta ársins var nýtingin 91 prósent.