Björn Leví vissi ekki af þingfundi: „Má ég vera hérna?“

Önnur umræða um frumvarp til fjárlaga stendur nú yfir á Alþingi og sér ekki fyrir endann á henni. Þingfundi var slitið stuttu eftir miðnætti og hófst hann aftur klukkan tíu í morgun. Björn Leví Gunnarsson, varaþingmaður Pírata, greindi frá því á fundinum í morgun undir liðnum fundarstjórn forseta að hann hefði mætt of seint vegna þess að hann hefði ekki verið látinn vita af þingfundinum, sem boðað var til með skömmum fyrirvara.

„Forseti, þegar ég fór í gær hafði ég ekki hugmynd um að það yrði þingfundur í dag. Ég skilaði tölvu og aðgangskorti og sagði bless,“ sagði Björn, sem tók sæti á þingi í fjarveru Birgittu Jónsdóttur. „Einnig vissi ég að samkvæmt starfsáætlun, þá er þingi lokið. Háttvirtur þingmaður Birgitta Jónsdóttir fór utan í vinnu á laugardegi og ætti samkvæmt öllu að koma aftur að vinna á laugardegi.“

Björn spurði Einar K. Guðfinnsson, forseta Alþingis, út í þingsköp þar sem stendur að varaþingmenn skuli ekki sitja skemur en eina viki nema þingi hafi áður verið frestað eða þinghlé sé hafið samkvæmt starfsáætlun.

„Nú lauk starfsáætlun náttúrulega í gær,“ benti Björn á. „Ég skil ekki hvað ég er að gera hérna, má ég vera hérna eða hvað?“

Á ábyrgð Alþingis að láta alla vita

Forseti sagði Björn eiga að vera á þingi samkvæmt þessum lögum. Björn hélt þó áfram og sagði svo hafa staðið á sér í gær þegar tilkynnt var um fundinn í dag með tölvupósti að eina leiðin til að ná í hann hefði verið í síma.

„Það var hringt í mig klukkan hálfellefu í morgun og spurt hvort ég vissi ekki að ég væri þingmaður,“ sagði Björn. „Ég svaraði því náttúrulega að ég vissi ekki einu sinni að það væri þingfundur. Ég vil spyrja hvar ábyrgðin á því liggur, hver á að láta vita hvenær þingfundur er? Eru það háttvirtir þingmenn sem starfa hér með mér eða er það Alþingi sjálft?“

Í svari forseta Alþingis kom fram að það væri að sjálfsögðu á ábyrgð Alþingis að láta vita af fundinum. Hann teldi að það hefði verið gert með því að senda tölvupóst á alla starfsmenn og þingmenn og með því að segja frá boðun fundarins á vef Alþingis. Jafnframt hafi hann rætt við fulltrúa allra þingflokkanna áður en fundurinn var boðaður.