Íslandsbanki hlýtur Gullmerki Jafnlaunaúttektar PwC

Íslandsbanki hlaut í dag Gullmerki Jafnlaunaúttektar PwC. Gullmerki Jafnlaunaúttektar PwC er veitt fyrirtækjum þar sem launamunur kynja er innan við 3,5%. Í úttektinni er gerður greinarmunur á grunnlaunum, föstum launum og heildarlaunum eftir kyni og að teknu tilliti til lífaldurs, starfsaldurs, menntunar, starfaflokks, stöðu innan fyrirtækis og vinnustunda.

„Gullmerki Jafnlaunaúttektar PwC er mikilvægur áfangi í þeirri vegferð okkar hjá Íslandsbanka að auka fjölbreytni og jafnrétti í stjórnun og starfsemi bankans,“ segir Birna Einarsdóttir, bankastjóri. „Við höfum unnið að þessu með markvissum aðgerðum á undanförnum misserum og ætlum okkur að halda áfram á þessari braut.“

Ríflega helmingur stjórnenda bankans í dag eru konur. Í níu manna framkvæmdastjórn bankans eru fjórar konur og í stjórn bankans eru konur í meirihluta.

„Ég þekki það af eigin reynslu að fyrirtæki sem leggja áherslu á fjölbreytni og jöfn tækifæri gengur betur að byggja upp öfluga liðsheild, eru með ánægðara starfsfólk og betri fyrirtækjabrag en þau fyrirtæki sem ekki eru komin þangað. Ég hvet því stjórnendur til þess að gefa þessum málaflokki gaum í daglegum störfum sínum.“