Icelandic Water Holdings semur við nýjan dreifingaraðila

Icelandic Water Holdings hf, sem flytur út vatn undir merkinu Icelandic Glacial og dreifingarfyrirtækið Unique Foods Inc. frá Montreal í Kanada hafa gert með sér samning um dreifingu á Icelandic Glacial. Þetta kemur fram í tilkynningu fá fyrirtækinu.

„Okkur er mikil ánægja að tilkynna að Unique Foods Inc. er nýr dreifingaraðili okkar í Kanada,“ segir Jón Ólafsson, stjórnarformaður og stofnandi Icelandic Water Holdings hf. í tilkynningunni.

„Unique Foods Inc er leiðandi dreifingarfyrirtæki á drykkjavörumarkaðinum í Kanada og mun samstarfið styrkja vörumerki okkar enn frekar í Kanada auk þess sem það mun leiða til markvissari dreifingar á Icelandic Glacial á landsvísu.“

Vatninu frá Icelandic Glacial er tappað á flöskur úr lind fyrirtækisins í landi Hlíðarenda í Ölfusi og þaðan dreift víða um heim.

„Við erum gífurlega ánægð með samning okkar við Icelandic Glacial,“ segir Jon Silver, forstjóri Unique Foods Inc. „Icelandic Glacial fellur fullkomlega að áherslum fyrirtækisins og mun standast allar kröfur neytenda er varðar tærleika, bragð og sjálfbærni“.

Icelandic Glacial, er selt á 20 mörkuðum víða um heiminn. Auk Kanada er Icelandic Glacial til sölu í Bandaríkjunum, Bretlandi, Frakklandi, Hollandi, Belgíu, Luxemborg, Rússlandi, Hvíta-Rússlandi, Kalíníngrad, Úkraínu, Kína, Taiwan, Macau, Tælandi, Suður-Kóreu, Singapore, Hong Kong, Perú og á Íslandi.

Jafnframt notar franska snyrti- og tískuvörufyrirtækið Christian Dior vatnið við framleiðslu á kreminu Dior Snow. Fyrirtækið var stofnað árið 2004 og eru Jón Ólafsson og Kristján Ólafsson stærstu hluthafar Icelandic Water Holdings ásamt bandaríska drykkjavöruframleiðandanum Anheuser Busch.