Capacent tekur yfir þjónustu og ráðgjöf vegna IBM Cognos frá Advania

Capacent og Advania hafa náð samkomulagi um að Capacent taki yfir þjónustu og ráðgjöf á IBM Cognos lausnum frá Advania.

Þetta kemur fram í tilkynningu frá  Capacent sem hefur um árabil verið stærsti sölu- og þjónustuaðili á IBM Cognos hér á landi og með þessum breytingum styrkir Capacent stöðu sína frekar á þessu sviði.  

Í tilkynningunni segir að hugbúnaður frá IBM Cognos sé leiðandi á heimsvísu á sviði árangursstjórnunar en undir það fellur meðal annars hugbúnaður til áætlanagerðar, fjárhagsuppgjöra, tölfræðilegra greininga og skýrslugerðar.  

Hjá Capacent starfa nú 12 ráðgjafar sem eru sérhæfðir á sviði stjórnendaupplýsinga.

Breytingin kemur til vegna áherslubreytinga hjá Advania á sviði viðskiptagreindar en framvegis mun fyrirtækið sérhæfa sig í Microsoft BI viðskiptagreindarlausnum.