84 þúsund ferðamenn til landsins í mars

Tæplega 84 þúsund erlendir ferðamenn fóru frá Íslandi í mars samkvæmt talningum Ferðamálastofu í Flugstöð Leifs Eiríkssonar. Þar eru 17.722 fleiri en í mars í fyrra og nemur aukningin 26,8 prósentum. Í janúar og febrúar mældist aukning milli ára um 34 prósent.

Í tilkynningu frá Ferðamálastofu kemur fram að 78,8 prósent ferðamanna í mars árið 2015 voru af tíu þjóðernum. Þar af voru Bretar 33,6 prósent og Bandaríkjamenn 17,2 prósent. Þar á eftir fylgdu fylgdu Þjóðverjar (6,0%), Frakkar (4,7%), Danir (3,8%), Norðmenn (3,7%), Svíar (2,7%), Kanadamenn (2,6%), Kínverjar (2,2%) og Hollendingar (2,2%).

Bretum, Bandaríkjamönnum og Þjóðverjum fjölgaði mest á milli ára en 7.049 fleiri Bretar komu í mars í ár miðað við mars í fyrra. Þá komu 2.174 fleiri Bandaríkjamenn og 1.657 fleiri Þjóðverjar. Að stórum hluta báru þessar þrjár þjóðir aukninguna, eða um 61,4 prósent.

Ferðamálstofa hóf talningar á Keflavíkurflugvelli árið 2005 og sé litið til þróunarinnar sést að ferðamönnum hefur fjölgað mikið í mars og þá einkum síðastliðin fjögur ár samkvæmt tilkynningunni.

Þrátt fyrir það hefur mismikil fjölgun eða fækkun átt sér stað eftir því hvaða markaðssvæði á í hlut. Fjöldi Breta hefur fimmfaldast frá árinu 2011. Fjöldi ferðamanna frá N-Ameríku hefur fjórfaldast og frá Mið- og S-Evrópu hefur fjöldin meira en tvöfaldast.

Frá áramótum hafa 217.092 ferðamenn farið frá landinu, eða um 51.800 fleiri en á sama tíma í fyrra. Það samsvarar 31,4 prósenta aukningu á milli ára. Um 33 þúsund Íslendingar fóru utan í mars síðastliðnum eða 8.300 fleiri en árið 2014. Um er að ræða 34,1 prósent fleiri brottfarir en í mars í fyrra.