Fer yfir það hvernig fyrirtæki geti nýtt sér nýjustu trendin

Aðalfyrirlesari á ÍMARK-ráðstefnunni er Daniel Levine, forstjóri Avant-Guide Institute og einn helsti sérfræðingur heims í að greina trend á mörkuðum.

Í erindi sínu mun hann fjalla um hvernig rannsóknir Avant-Guide geta hjálpað fyrirtækjum að sjá fyrir hvaða trend verða ráðandi á markaðnum þannig að þau geti brugðist við þörfum viðskiptavina sinna og skapað sér ný tækifæri. Í ögrandi og síbreytilegu viðskiptaumhverfi eru slíkar upplýsingar afar dýrmætar.

Daniel mun sýna dæmi um fyrirtæki úr mismunandi geirum sem hagnast og blómstra með því að hlusta, fylgjast með og fræðast um það sem sem skiptir viðskiptavini þeirra máli. Þá mun hann fjalla um það hvernig fyrirtæki á Íslandi geta nýtt sér þessi sömu trend á auðveldan og frumlegan hátt til að ná athygli, auka sölu og styrkja vörumerki. Skráning fer fram á imark.is 

Daniel kom einnig fram á ÍMARK fyrir ári síðan og fór þá yfir þau trend sem markaðurinn stóð frammi fyrir og mun hann nú fara yfir hvernig úr rættist.

Daniel Levine og fyrirtæki hans Avant-Guide hefur veitt mörgum af stærstu fyrirtækjum heims ráðgjöf og aðstoð við að greina hvað er handan við hornið og nýta sér ný trend. Meðal þessara fyrirtækja eru MasterCard, Deutche Telekom, Samsonite, HBO og NBC. CNN hefur þetta að segja um Daniel Levine: „Levine is the ultimate guru of cool… he has a remarkable ability to distill trends to their essence and articulate them in a way we can all benefit from”

Ráðstefnan fer fram fimmtudaginn 15.janúar í sal Arion banka Borgartúni 19. Húsið opnar kl. 8:30 en ráðstefnan hefst kl. 9:00 og lýkur kl. 12:00.

Fundarstjóri verður Guðmundur Arnar Guðmundsson, markaðsstjóri Nova, en hann mun einnig fara yfir helstu trendin í fjarskiptageiranum á Íslandi. Auk hans og Daniel Levine munu eftirfarandi fyrirlesarar flytja erindi á ráðstefnunni:

● Þorvarður Tjörvi Ólafsson, hagfræðingur hjá Seðlabanka Íslands, sem mun kynna hagspá Seðlabanka Íslands 2015/2016.

● Dr. Þorlákur Karlsson, rannsóknarstjóri Maskínu, sem mun kynna niðurstöður íslenskrar rannsóknar byggðar á spá Daniels Levine.

● Halla Helgadóttir, framkvæmdastjóri Hönnunarmiðstöðvarinnar, sem mun fjalla um nýjustu trendin í hönnun fyrir tímabilið 2015/2016.

● Eva Dögg Sigurgeirsdóttir, framkvæmdastjóri Tíska.is, sem fjallar um nýjustu trendin í tísku fyrir tímabilið 2015/2016.

● Halli Friðgeirs, innanhússarkitekt, sem fjallar um nýjustu trendin í innanhússhönnun fyrir tímabilið 2015/2016.