Messi fór á kostum og afgreiddi Bilbao

Barcelona átti ekki í neinum vandræðum með að sigra Athletic Bilbao í úrslitum spænsku bikarkeppninnar. Lionel Messi og Neymar tryggðu Barcelona 3-1 sigur.

Messi kom Barcelona í 1-0 með marki sem fer líklega í sögubækurnar fyrir fegurð. Markið skoraði Messi eftir frábæran einleik upp kantinn sem endaði með föstu skoti á nærstöngina. Neymar skoraði annað mark Barcelona skömmu síðar og staðan í hálfleik var 2-0.

Messi var ekki hættur því hann kom Barcelona í 3-0 þegar um 15 mínútur lifðu leiks. Þar með var sigur Barcelona nánast í höfn og engu breytti þó Inaki Williams hafi minnkað muninn fyrir Athletic Bilbao 10 mínútum fyrir leikslok.

Barcelona er því tvöfaldur meistari á Spáni og getur fullkomnað tímabilið um næstu helgi þegar liðið mætir Juventus í úrslitum Meistaradeildar Evrópu. En leikið verður í Berlín næsta laugardag.