Tyrkir koma líki flugmannsins til Rússlands

Yfirvöld í Tyrklandi komu í dag höndum yfir lík rússnesks flugmanns sem lést í Sýrlandi. Oleg Peshkov var skotinn til bana af Túrkmenum, eftir að sprengjuflugvél hans var skotin niður af Tyrkjum á þriðjudaginn. Atvikið hefur valdið mikilli spennu á milli ríkjanna.

Rússneskir embættismenn tóku á móti líkinu á flugvelli í Ankara, höfuðborg Tyrklands.

Samkvæmt heimildum Reuters fréttaveitunnar var líkið flutt yfir landamæri Sýrlands og Tyrklands í sjúkrabíl. Því var svo flogið til Ankara þar sem rússneskir embættismenn tóku við því. Hinn flugmaður vélarinnar komst undan uppreisnarmönnum og var á flótta í tólf tíma. Honum var bjargað af sýrlenskum sérsveitarmönnum.

Tyrkir segja flugvélinni hafa verið flogið inn í lofthelgi sína og að flugmenn hennar hafi hundsað ítrekaðar viðvaranir. Rússar segja hins vegar að flugvélin hafi verið yfir Sýrlandi þegar hún var skotin niður. Yfirvöld í Moskvu segja að um skipulagt atvik hafi verið að ræða og beita Tyrki nú þvingunum að margvíslegum toga.