Breytingar í yfirstjórn Creditinfo

Brynja Baldursdóttir hefur verið ráðin framkvæmdastjóri Creditinfo Lánstrausts hf. Fráfarandi framkvæmdastjóri, Hákon Stefánsson, verður aðstoðarforstjóri Creditinfo Group hf. og stjórnarformaður Creditinfo Lánstrausts hf. Þetta kemur fram í tilkynningu frá fyrirtækinu.

Hákon er með lögfræðipróf frá Háskóla Íslands og varð framkvæmdastjóri Creditinfo Lánstrausts árið 2006 eftir að hafa verið forstöðumaður ráðgjafasviðs Intrum Justitia og bæjarlögmaður Akureyrarbæjar. Árið 2009 tók hann að sér að stjórna sölu og uppbyggingu nýrra markaða hjá Creditinfo International GmbH í Þýskalandi og því starfi gengdi hann til hann til ársins 2011 þegar hann tók við stöðu framkvæmdastjóra Creditinfo á Íslandi.

Brynja hefur stýrt viðskiptastýringu og þróun hjá Creditinfo frá ágúst 2013. Hún var samstæðustjóri hjá Oz og starfaði um árabil hjá Símanum, meðal annars sem forstöðumaður vefdeildar og forstöðumaður sölu á einstaklingssviði. Brynja er með BS próf í véla- og iðnaðarverkfræði frá Háskóla Íslands og MSc próf í aðgerðagreiningu frá Georgia Institute of Technology í Atlanta.