Gufan frá Hverahlíð dugar ekki til – vinnsluhola boruð

Áætlanir Orku náttúrunnar, dótturfyrirtækis Orkuveitu Reykjavíkur, um að viðhalda framleiðslu Hellisheiðarvirkjunar í nokkur ár með því að sækja gufu í fjórar borholur í Hverahlíð ganga ekki eftir. Frá því að ljóst var að núverandi vinnslusvæði virkjunarinnar stendur ekki undir fullri framleiðslu til frambúðar hefur framleiðslan fallið niður fyrir 260 megavött (MW). Uppsett afl virkjunarinnar er hins vegar 303 MW.

Orka náttúrunnar sendi frá sér fréttatilkynningu í gær þar sem kom fram að á næstu dögum hefjist framkvæmdir við nýja vinnsluholu á Hellisheiði – þá fyrstu frá árinu 2009. Þar kemur fram að raforkuframleiðslan í virkjuninni hefur minnkað meira en áætlað var og því nauðsynlegt að bora nýja holu samhliða lagningu Hverahlíðarlagnar.

Marta Rós Karlsdóttir, forstöðumaður auðlinda hjá ON, segir rétt að Hverahlíðarlögnin hafi átt að duga til að viðhalda framleiðslu í Hellisheiðarvirkjun í nokkur ár án borana. Í millitíðinni voru fjórar kraftminni holur á vinnslusvæði Hellisheiðar teknar í notkun og áttu að brúa bilið þangað til lögnin tengdist virkjuninni. 

„Tvær þessara hola gefa nú ekki meiri gufu og með því minnkaði framleiðslan um 10 MW í einu þrepi á vormánuðum 2015. Þá stendur einnig til að hvíla fleiri vatnsríkar holur þegar gufa fæst frá Hverahlíð. Þetta gerir það að verkum að gufan frá Hverahlíð dugar ekki til að koma framleiðslu virkjunarinnar í það horf sem áætlað var, eða í um 280 MW að jafnaði, og því er nauðsynlegt að bora nýja holu á þessum tíma,“ segir Marta.

Virkjunin framleiddi á fullum afköstum til ársloka 2012; 303 MW. Um sumarið gat hún mest framleitt 276 megavött. Meðaltalsframleiðsla frá áramótum 2014-2015 er 262 MW, en ekki fást við því svör hvað framleiðslan hefur verið lægst á þessu tímabili.

Í svörum ON við fyrirspurn Fréttablaðsins um hvort staða virkjunarinnar sé ekki mun verri en menn hafa talið, segir að rétt sé að framleiðsla dali hraðar en áætlað var og vonir um lausnir hafi ekki gengið eftir. Hins vegar sé fyrirhuguð vinnsluhola hluti af eðlilegu viðhaldi og „alls ekki óvenjuleg aðgerð“.