ThorIce fær styrk til að kanna markaði

Tæknifyrirtækið ThorIce hefur fengið 20 milljóna króna styrk ásamt Iðntæknistofnun Danmerkur til að gera forkönnun á markaðstækifærum í Danmörku og möguleikum á notkun tækni fyrirtækisins til orkusparnaðar í danskri matvælaframleiðslu. Gangi verkefnið vel er möguleiki á stækkun þess í framtíðinni.

Þorsteinn Ingi Víglundsson, ásamt samstarfsfólki sínu, hefur í rúman áratug þróað og framleitt sérhæfðan kælibúnað fyrir sjávarútveg. Sama kjarnatækni hefur svo verið aðlöguð fyrir kælingu á kjúklingi og við vatnshreinsun í matvælaiðnaði og öðrum iðnaði. Tæknin er nú þegar í notkun í landbúnaði í Hollandi og lyfjaiðnaði þar sem hún er notuð til að hreinsa spilliefni úr vatni.

Tækni ThorIce er nefnd sem gott dæmi um hvernig tækniþróun fyrir sjávarútveg getur opnað ýmis tækifæri í sölu á tækni og þekkingu til annars konar matvælavinnslu og í aðra geira eins og lyfjageirann. ThorIce er eitt þeirra fyrirtækja sem verið hafa í Húsi sjávarklasans frá því það var opnað árið 2012.