Affallið alltaf gott á haustin

Veiðin í Affallinu hefur verið með ágætum í sumar og er áin rétt að detta yfir 400 laxa en á þó besta tímann inni.

Göngur í Affall í Landeyjum hafa verið góðar í sumar og þeir veiðimenn sem hafa verið í ánni tala um að nóg sé af laxi í hyljum hennar. Það sem helst hafi haldið aftur af veiði suma dagana er þegar það gengur á með hvössum vind en það hefur gert mönnum erfitt fyrir þegar vindhviðurnar gera fluguveiði að engu. Veiðitalan í ánni gæti því vel verið mun hærri en hún er og fái þeir sem eiga daga í henni í haust fallegt og gott haustveður getur allt gerst við ánna. Affallinu er haldið uppi með seiðasleppingum eins og bæði Ytri- og Eystri Rangá og í takt við þær fær hún sterkar göngur síðla sumars. Þegar þetta gerðist síðast árið 2010 veiddust yfir 1000 laxar í ánni sem er met í henni.

Þverá í Fljótshlíð er svipuð og Affallið, það er að segja henni er haldið uppi af gönguseiðasleppingum, og þar hefur veiðin einnig verið með ágætum í sumar en þar eru komnir yfir 200 laxar á land og mikið af laxi liggur í henni, sérstaklega í hyljunum í kringum sleppitjarnirnar. Leyfin í báðar árnar eru frekar ódýr og veiðivon góð en Affallið er að mestu uppselt samkvæmt upplýsingum frá leigutaka en stakir dagar á stangli í Þverá.