Sjóbirtingurinn er mættur í Varmá

Varmá hefur verið ein vinsælasta vorveiðiá suðvesturhornsins en hún er líka feyknagóð á haustin.

Eins og aðrar sjóbirtingsár er verið að veiða sjóbirting á niðurleið á vorin en á uppleið á haustin og þá kmeur hann feitur og flottur úr hafi og getur tekið flugurnar ansi grimmt. Þeir sem hafa veitt Varmá síðustu dagana hafa verið að gera mjög góða veiði og stærðin á sjóbirtingnum er yfirleitt um 45-70 sm en það er mjög öflugur fiskur að eiga við.

Best hefur verið að veiðast á púpur andstreymis og hafa flugur hnýttar með UV-fluorcent verið að gefa mjög vel. Í bland við flotta sjóbirtinga eru vænar bleikjur í ánni, bæði þær sem halda til í Stöðvarhyl en þeir eru þekktar fyrir að vera mjög stórar og líka sjóbleikjur en mest af henni veiðist í neðri hluta Varmár. Inná milli má svo sjá stöku laxa en árlega veiðast 20-30 laxar í ánni ásamt staðbundnum urriða. Það er flottur tími framundan í Varmá og fín hugmynd fyrir þá sem vilja kljást við göngufisk frekar en legna laxa að kíkja austur.