Dominos áfram með kók

Vífilfell hefur samið við pizzakeðjuna Domino‘s um sölu drykkja fyrirtækisins til ársins 2020, en samstarf fyrirtækjanna nær aftur til ársins 1993. Þá var fyrsti Domino‘s staðurinn opnaður, en nú rekur keðjan 19 staði á landinu og er stærsti endursöluaðili drykkjarvarar í veitingageiranum á Íslandi, samkvæmt tilkynningu frá fyrirtækjunum.

„Þessi samningur er afar mikilvægur fyrir okkur enda er Domino‘s vinsælasti skyndibitastaður landsins og samkeppni um slíka staði er hörð,“ segir Árni Stefánsson, forstjóri Vífilfells. „Það var hins vegar ánægjulegt sem kom fram í samningsgerðinni að þetta er líka mjög mikilvægur samningur fyrir Domino‘s þar sem viðskiptavinahópur þeirrar er stór og tryggur og margir úr þeim hópi geta ekki hugsað sér annað en Coke með pizzunni sinni.“

Velta Domino´s hefur nærri tvöfaldast á síðustu þremur árum og nærri helmingur pantana hjá fyrirtækinu kemur nú í gegnum netið eða Domino‘s appið sem um 47.000 Íslendingar eru með í símanum sínum, samkvæmt tilkynningunni.

„Þetta er mikilvægur samningur. Drjúgur hluti viðskiptavina okkar kaupir gos- og vatnsdrykki þegar þeir panta hjá okkur og við erum sannfærð um að pizzurnar bragðist einfaldlega betur með ísköldu Coke,“ segir Birgir Örn Birgisson, framkvæmdastjóri Domino‘s Pizza. „Samstarfið við Vífilfell hefur gengið vel og með þessum samningi munu viðskiptavinir Domino‘s áfram geta pantað Coke, Sprite og aðra drykki frá Vífilfelli.“