Áttræður selur bar í Árbænum og bíður eftir atvinnutilboðum

„Ég veit ekkert hvort ég sé hættur að vinna,“ segir 82 ára gamli veitingamaðurinn Guðmundur H. Sigurðsson. Guðmundur hefur rekið barinn Blásteinn í Árbænum með syni sínum Jónasi Guðmundssyni undanfarin fjögur ár. Feðgarnir hafa nú selt barinn til félagsins 1812 sem einnig rekur barinn Búálfinn í Breiðholti.

Guðmundur segir vel geta verið að hann fari aftur að vinna bjóðist honum starf.

„Ég ætla að taka því rólega núna. Nú er kominn tími til að sinna sjálfum sér og konunni meira. Ég hef ekki sinnt henni nóg undanfarið,“ segir Guðmundur og bætir við: „Það sem skiptir mestu máli er heilsan.“



Guðmundur segist ekki vita til þess að margir séu í vinnu á þessum aldri. „Ekki í fullu starfi að minnsta kosti,“ segir hann.

Nærri 70 ára starfsævi

Guðmundur segist hafa byrjað að vinna fljótlega eftir fermingu. Því spannar starfsævin nærri 70 ár. „Mitt ævistaf var þvottur og hreinsun. Ég rak Efnalaugina Hraðhreinsun sem var Súðavogi 7 í 40 ár. Fönn keypti hana af mér árið 1996. Svo var ég með sendifyrirtæki í 5 ár,“ segir Guðmundur um hvað hann hafi tekið sér fyrir hendur síðustu 70 árin.

Aðspurður hvað standi upp úr á starfsævinni segir Guðmundur: „Þetta er bara vinnan. Maður á að sinna sínu starfi og gera það vel. Það hefur maður reynt að gera og ég held að það hafi tekist nokkurn veginn.“

Einhverjar breytingar á Blásteini

Skúli Júlíusson, einn þeirra sem mun taka við rekstri Blásteins, býst við að halda rekstrinum áfram í álíka mynd. „Það verður áfram sportbar og pítsastaður hér,“ segir Skúli en á Blásteini hefur pítsastaðinn Lautin Pizza verið að finna auk veitingastaðarins Grillhús Árbæjar. Skúli segir þó að einhverjar breytingar verði á rekstrinum en ekki sé tímabært að tilkynna þær að svo stöddu.